Enjoy cooking
Browse through over
650,000 tasty recipes.
Home » » عرق اللحمة الباردة بصوص الفلفل الاسود

عرق اللحمة الباردة بصوص الفلفل الاسود

Written By Mony on Monday, July 9, 2012 | 9:02 AM

كتير كانوا عايزين طريقة عرق اللحم الباردة 

اللي هو الروستد فيليه

هنعمله انهردة بصوص الفلفل الاسود
و طبعا الصوصات ديه بتبقي حسب ما تحبي

المهم نبدأ بسم الله


نروح للجزار و نقوله عايزين عرق لحم باردة او عرق تربيانكو

على حسب المناسبة بتاعتك عايزاه كبير و لا صغير

و بتقوليله يجهزه و يربطه كويس

و انتي تتبليه براحتك 

التتبيلة الاساسية بتكون بسيطة جدا و هي:
نجيب راس ثوم و نقشرها و نقسم الفص الواحد نصفين بالطول


و نحطهم في شوية ملح بالفلفل
و نغرز السكين في العرق في اماكن متفرقة بالتساوي

هتعمل فتحات كتير نحاول نخليها غويطة شوية علشان تاخد نصف فص الثوم كله و مايطلعش منك اثناء التسوية

و نحط انصاف فصوص الثوم ديه اللي بالملح و الفلفل جوة الفتحات اللي عملناها
و بعد ما نخلص ندهن العرق كله بالملح و الفلفل كويس

ديه التتبيلة الاساسة

ممكن تزودي لو تحبي من برة
ممكن نعمل خليط ربع كوب زيت زيتون نحط فيه ملح و فلفل و روز ماري و زعتر و ممكن زبادي و ندهن بيه العرق من برة

بس خليكي في الاساسى الاول و بعد كده فنني براحتك يا ستي

:)

و نجيب صينية كبيرة مستطيلة او بيضاوية او حلة تاخد العرق كله بطوله

علشان  مايطلعش متني منك

و نحط فيها شوية زيت

يادوب نملى القعر بس
و نبدأ نحمر فيهاالعرق بالراحة لحد ما ياخد لون التحمير البني من جميع الجوانب
و بعدين نزود ماية مغلية نغطي بيها العرق
لو الصينية ماتاخدش مافيش مشاكل حطي للنص و نزود كل فترة لما نحص ان الماية قربت تخلص
و هنحط مع الماية ورق لورى و حبهان و مستكة ممكن و طماطم صغننة و بصلاية صغننة
ممكن نزود جزر و كرفس "افرنجي او عادي"حسب الرغبة

خدي بالك مازودناش في الماية ملح خاااالص علشان يستوي
و نغطي الصينية او الحلة بالورق الفويل كويس جدا

الموضوع بياخد تقريبا من ساعة و نص لساعتين على حسب وزن العرق
طبعا ممكن يزيد او يقل حسب الوزن برضه
فكل فترة نلقي نظرة عليه و نشوف اخبار السوا ايه و اخبار الماية لو محتاجة تتزود
و بعد ما يستوي نشيل منه الحبل اللي كان مربوط بيه و نسيبه يبرد خااالص قبل التقطيع
و نقطعه بعد كده بسكينة مشرشرة علشان مايتهريش مننا

 و نرصه في سرفيس التقديم و نحط عليه الصوص اللي تحبيه
انا بحب معاه صوص الفلفل الاسود

في كاسارولة نحط شوية زيت في القعر و نحط عليه ملعقة كبيرة فلفل اسود مجروش
"مش مطحون و مش حصي"
كمية الفلفل تتحكمي فيها انتي برضه على حسب كمية الصوص اللي عايزاه


ديه صورة عن قرب توضح الفرق بين الفلفل الحصى و المجروش

في مطاعم بتحط شوية فلفل حصى كديكور زي كده

لكن المطلوب الطعم فبناخده من المجروش و مافيش مانع نحط شوية حصى
و نقلب شوية علشان الريحة تظهر و ممكن كمان نحط معاه مشروم 
بيدي شكل جميل
نقلبه شوية مع الفلفل المجروش
 و نحط عليه بعد كده 2 كوب من المرقة بتاعة العرق اللي عملناه 
هنستخدمها كـ"جريفي صوص" علشان اللون
و نسيبها على النار لحد ما تغلي
اول ما تغلي احط عليها كوب كريمة و اقلب لحد ما القوام يبدأ يتخن شوية
انا مش بستخدم الكريمة كتير بحط مكانها كوب لبن عليه 2 ملعقة دقيق مدوب فيه و اقلب كويس افضل و اسرع و نفس النتيجة
لو بتحبي الصوص يكون غامق يبقى كفاية نص كوب كريمة او نص كوب لبن بملعقة دقيق مذوبة في اللبن كويس
و يوصل بس لقوام الصوص بتطفي عليه و تحطيه و هو سخن على العرق اللي انتي رصيتيه في السرفيس
و بألف هنا و شفا


**ملحوظة**
للي مش بتعرف تعمل الفلفل مجروش
شيف شيربيني كان قال قبل كده رشي على سطح الرخامة شوية ملح خفيف بس علشان الفلفل مايجريش و حطي عليهم الفلفل و دوسي عليه بالراحة بالنشابة "العصاية بتاعة فرد العجين" او اي حاجة على شكل اسطوانه عندك و امشي عليهم كده كأنك بتفرديهم و هتلاقيه اتجرش بسهولة خالص
افتكري ماتكتريش الملح لان الغرض منه انه يمنع الفلفل انه يجري بس:))


 مستنية رأيكم طبعا
:))

SHARE

About Mony

6 comments :

مها said...

جميل جدااا انا من عشاق صفحتك بس انا بعمل عرق التلبيانكو لان الفلتو شوى بس اكيد من ايدك هيكون يجنن و ليا طلب لو ممكن يعنى ياريت مقادير السويسرول لانى من زمااااان مش عملته و نسيتها و ميرسى يا قمر

Mony said...

مها

شكرا مها على رأيك
و على لفت نظري للخطأ المطبعي
:)
تم تعديله
هي فعلا اللحم الباردة بيتعمل بالعرق التربيانكو

بالنسبة للسويسرول فللأسف انا ماعملتوش قبل كده فمقدرش افتي فيه من غير علم
ديه طريقة منال العالم لسوسيرول الشيكولاته
http://www.youtube.com/watch?v=LJhGgoWbt3w
و ديه طريقتها لسويسرول المربى
http://www.youtube.com/watch?v=vU1H05efFU4

الست ديه ممتازة و مقاديرها بتكون مظبوطة معاية دائما

يارب اكون افدتك
:)

Unknown said...

انا عملتها مع صوص الفلفل الأسود. و الناس اتجننوا عليها
بجد تسلم ايديكى يا مونى
بس انا زودت صوص الشوى 😉

Mony said...

Ola Naguib

بالهنا و الشفا يا علا
:))
و تسلم ايد اللي وقف و تعب
ويارب دايما كده ربنا يصلح كل حاجة بتعمليها بإيدك

:)

Baytikalsagser said...

رائع جزاك الله خير

Mony said...

mona Ahmed
جزانا و إياكم
;)