Pages

Loading...

Sunday, March 1, 2009

الجلاش بالكستر

انا بحب الجلاش ده اوي


و ليه معجبين الحمد لله


أي مناسبة لازم يكون موجود

و طريقته سهلة و بسييييطة جدا

و ما بياخدش وقت خالص



الطريقة لعمل صينية وسط

لفة جلاش
(انا بفضل الزهار)

2 كوب لبن

ملعقتين كبار مليان كاستر فانيليا

فستق مجروش خشن للزينة
(حسب الرغبة و المتاح)

سمن بلدي
(بتفرق و الله يا جماعة في الطعم و الريحة اوي)



بنحضر الشربات في الاول

بنحط كوبايتين ماية علي كوب و نصف سكر و عليهم عصير نصف ليمونة

و نحطهم علي النار

و عند بدأ الغليان نحط كيس فانيليا
و نسيبه يغلي لحد ما يصل للقوام المطلوب تقريبا 10 دقائق
(بالنسبة للجلاش الشربات المفروض يكون تقيل بس مش اوي)


نعرف القوام باننا نحط ملعقة في الشربات و نخليها تنقط علي سطح رخامي

و لما النقطة تنزل و تفرش بالرحة تكون استوت و نطفي النار

لو نزلت النقطة ثقيلة و مافرشتش يبقي اعملي بيه أي حاجة تانية غير الشربات

للي اول مرة يعمل الشربات ياريت يعمل الاختبار ده كل شوي



و بعد ما الشربات يخلص نحطة في الثلاجة

علشان لازم نحطه علي الجلاش ساقع







و بعدين بنحضر الكاستر
بحط كوبايتين اللبن في كسرولة و احليهم بالسكر

و احط عليهم ملعقتين الكاستر و اقلب كويس علشان الكستر يدوب كويس

(علي فكرة للي مش بيحب الحاجة مسكرة زيادة ممكن ماتحليش اللبن و كفايا الشربات)

و احطهم علي النار

مع التقليب علشان ما يكلكعش

و لما يغلظ القوام نطفي النار
(يفضل قوام الكستر بتاع الحشو يكون غليظ اوي)

و اركنه علي جنب علي ما يبرد



و ابدأ في عمل الجلاش

ادهن الصينية سمن بالفرشة

و بعدين اقسم لفة الجلاش نصفين
(هي تقريبا بتكون 18 او 19 ورقة)

و نبدأ نحط راقين و ندهنهم بالفرشة سمن

و نثني الجوانب لتحت علشان الشكل النهائي
(يعني نطبقها لتحت)



و هكذا كل مرة ورقتين في الراق الواحد لحد ما نعمل اربع راقات و بعدين نحط ورقة واحدة بس و ماندهنهاش سمن علشان هنحط فيها الحشو و مانتنيش اطرافها نخليها لفوق كده علشان نفقلها علي الحشوة علشان مايسحش و يتحرق من الجوانب

و نحط الحشو نقفل الاطراف عليه

و فوقه ورقة واحدة تانية نغطي بيها الحشو و ندهنها سمن

و بعدين تكمل وضع الجلاش ورقتين بعد ورقتين كما بدأنا لحد النهاية



و كده نكون خلصنا الصينية

و نقطعها بالسكين بالشكل اللي انت عايزاه

و ندخلها الفرن في الرف اللي من تحت علي درجة حرارة متوسطة

و لما تبدأ في الاحمرار من الجوانب نحطها تحت الشواية علشان اللون

طبعا ممكن نحطها في الرف اللي في النصف بحيث تتحمر من تحت ومن فوق مع بعض في نفس الوقت

بس بالطريقة اللي قلت عليها بتكون مقرمشة من تحت و من فوق و في النصف طريه
زي بتاعة برة




و كده خلاص خلصت

بمجرد ما تطلع من الفرن لاااازم نسقيها شربات ساقع

و نغطيها مباشرة بورق جرايد

جرنال كامل علي بعضه



و رق الجرايد احسن من غطاء الحلة علشان بيمتص البخار اللي متصاعد من الجلاش و في نفس الوقت مايكتمهوش فيعجن

و نسيبها لحد ما تشرب الشربات و تبرد شوي

و تقدم



طيب لو مش عايزة كاستر او مش متاح

ممكن مهلبية
( كوبين لبن +ملعقتين كبار نشا و ندوبهم مع بعض ونحطهم علي النار لحد ما يغلظ القوام)

(طريقة حبيبتي صبرني يا رب)

وتكون بنفس الخطوات برضه



طيب لو عايزاها محشية مكسرات او مش محشية خالص

المكسرات بتكون عبارة عن كوب مكسرات و عليه نصف كوب جوز هند و عليه نصف كوب سكر و يتقلبوا مع بعض و نحطه في النصف



بس مش نفس الطريقة

بنجهز الصينية عادي ونقسم اوراق الجلاش نصفين

ونحط النصف الاول كله دفعة واحدة و نحط فوقه الحشو و نحط النصف الاخر برضه كله دفعة واحدة

من غير أي سمن بين الورق

و نقطع الجلاش بالسكين بالشكل المرغوب

و نصب فوقه كوب سمن بلدي ساخن جدا بحيث ينزل يطش علي الوجه

و بحيث يصل لكل الاماكن بالتساوي



و لو سادة نحط ورق الجلاش كله دفعة واحدة و نقطعه بالشكل بتاعنا

و نحط عليه كوب السمن
(لا تقلقوا هنتخلص منها بعدين)

و يدخل الفرن عادي

بس بمجرد ما يخرج اصفيه من السمن الزائد

(هينزل كتير ماتخافوش)

و كده بيخرج مورق زي بتاع المحلات بالضبط



و بعدين نحط عليه الشربات عادي و نغطيه بالجرنال



علي فكرة طريقة الشربات ديه بتاعة منال العالم
(اكيد عارفينها طبعا)



و برضه فكرة السمن علي الجلاش المحشي بالكسرات و السادة ديه قالت عليها منال العالم و شيف اسامة السيد




و بالهنا و الشفا



6 comments:

صبرني يارب said...

هيه هيه موني رجعت

اي نعم بنص رجل بس مش مهم اهو رجعتي وخلاص

عقبال الرجل التانيه يا اختي

فتافيت said...

يا سلااااااام عليكي
وربنا استاذه بموت في الجلاش والكنافة بالكستر والكريمة
ونورتي مدونتي
وانا هنا زبونة دايمة
اهو اتعلم حاجة .. غير البيض والبطاطس المحمرة
بوسة كبيرة علشان الجلاش

mony said...

صبرني يارب

ربنا يكرمك يا صبصب يا حبيتي

كله بفضل مجهوداتك الجبارة

انا دخلت هنا بالرجلين الاتنين الحمد لله
فتحتها خلاص لكل الناس


لسة التانية ياااااااااااا مسهل

mony said...

فتافيت

اتفضلي يا ستي

تحت امرك

شوفي عايزة ايه تاني و من عنينا الاتنين نعملهالك

بنت مصر said...

يم يم يم

بمووووت في الجلاش والكنافة بالكستر

تسلم الايادي

شكلي حكون زائرة دائمة عندك يا موني

mony said...

بنت مصر

انا كمان بعشقة
و بتلكك علشان اعمله


اهلا بيكي بس مش زائرة
لا
صديقة للمدونة و لصاحبتها